Вершыкі-загадкі ад Алены Церашковай

[TroLik]

падкажыце, дзе можна знайсьці дзіцячыя вершыкі-загадкі?!
(у прыватнасьці цікавяць вершаваныя загадкі слова "ключ", "дзьвер", "замок"...)

[Black aspid]

трымайце.

Я на клямачцы вішу -не кусаю, не брашу.
Не пушчу чужых у госці, не прашу за гэта косці...
Здагадацца ты ўжо мог, што размова пра замок.
Алена Церашкова.

[TroLik]

ай, дзякуй!!!
а пра дзьверы й ключык ня ведаеце?!?!

[Black aspid]

ужо ведаю.

Я любога прыпыняю,
падаваць руку змушаю.
Маю вочка і званок,
маю моцны я замок.
Толькі вартаму даверу
гаспадар адчыніць дзверы!
Алена Церашкова

Ён у вашага замка
нібы правая рука.
Далікатна, небалюча
адмыкае дзверы ключык.
Алена Церашкова

ЗЫ Даследчыкі маёй творчасці! Датай напісання гэтых твораў можна лічыць дату іх публікацыі

[Palina007]

Алена, мала хто настолькі ўдала піша вершы "на замову"! Пагатоў дзіцячыя. Пагатоў загадкі.
Трэба Вам што-небудзь яшчэ замовіць
Пра кветкі можаце? Прыкладам, дзьмухавец, бэз, незабудка, валошка, рамонак, шыпшына... Ці яшчэ што-небудзь знаёмае-пазнавальнае.

[Black aspid]

дзякуй шчыры пабачым. Пакуль што "вітальная" тэма раскручваецца:
Расцягнуўся ён пры дзверы
(стаў сурвэткай дзеля ног),
не прапусціць у кватэру
бруд прыгожы дыванок.
Алена Церашкова

Я крычу ўсё часцей:
гаспадар, прымай гасцей!
Шчабятаць магу як птушка
Ці мычэць нібы цялушка,
Ды за звонкі галасок
клічаце мяне - званок.
Алена Церашкова

[julcik]

Так, мне таксама вельмі падабаюцца. Нязмушаныя вершы.

[mama Halja]

Black aspid, ня маю слоў! !

[Black aspid]

крыху на раслінную тэму

Маніць чырванню пладоў
Шчыльная сцяна кустоў.
На калючкі не крыўдуй,
Лепш плады іх пакаштуй.
Не шукай наўпрост дарог:
жываплотам вырас глог.
Алена Церашкова

Беларускай ружай клічуць.
Пчолкі кветкі ёй казычуць.
Як пялёсткі абляцелі -
Хутка і плады паспелі.
Толькі есці іх не варта.
Лепей кінуць у гарбату.
Мноства розных вітамінаў
назапасіла шыпшына.
Алена Церашкова

[Palina007]

Black aspid, ну зусім файна! Мне ВЕЛЬМІ падабаецца.
Шыпшыну адгадалі! А глог - не (бо ўлетку не звярталі на яго ўвагі, хоць ля садка расце ))

[Black aspid]

дзякуй. Тады працягваю

Красавала, чырванела
кветачка на градках.
Як пялёсткі абляцелі - засталася хатка.
Патрасеш - яна звініць.
Хто у хаціне той сядзіць?
Булкам адмысловы смак
надае звычайны мак.
Алена Церашкова

[TroLik]

дзякуй-дзякуй-дзякуй!!! дапамаглі!!!!!!!!

[Black aspid]

цікава, куды такая спецыфіка спатрэбілася. Але працягнем.

За плот чапляецца вусамі
сцябло з тугімі гаманцамі.
У гаманцах сядзяць сынкі,
гадуюць круглыя бакі.
Калі вусач пажоўк, засох,
глядзі: пара збіраць гарох!
Алена Церашкова

[Kotka]

Black aspid, класна! загадкі проста цуд

[Black aspid]

шчыры дзякуй.

Краску клічуць пустазеллем:
рвуць усе, ніхто не сее.
Пчолкі ў жыта залятаюць,
неба кропелькі шукаюць.
Ведае, напэўна, кожны
Нашы сціплыя валошкі.
Алена Церашкова