Імянныя вершыкі ад Алены Церашковай -- замаўляйце!

[Black aspid]

ЗОРКА КАРНАВАЛА

На ранішнік трэба касцюм Караліне,

і маму ў спакоі яна не пакіне.

Была Караліна ў абліччы пінгвіна,

Была і ў стракатым убранні паўліна,

Быў строй павучыны: нібы з павуціння,

і яйка птушынае - у рабацінні...

Ўздыхае матуля:

-Аёй, Каралінка,

Ну хоць бы разок апраніся... дзяўчынкай!



Алена Церашкова

[Black aspid]

ЛЯВОНЧЫНА РАБІНКА
Ля самае форткі у спальні Лявонкі

Рабіна спусціла чырвоныя гронкі.

Штораз прачынаецца ўранні дзяўчына,

і вабіць яе тая гронка рабіны.

Пытаецца ў мамы, пытаецца ў таты,

ды кажуць бацькі:

- Пачакай, ранавата!

Ударыць мароз - пакаштуеш рабінкі...

Сумуе Лявонка, каўтаючы слінкі.

Аднойчы уранні птушынае войска

абсела рабіну занадта па-свойску,

і ўбачыла раптам малая Лявонка:

Зладзейкі дзяўбуць запаветную гронку!

А Божа! Скандал! І збянтэжаны тата

пяць ягад прынёс на далоні дахаты.

Заплюшчыўшы вочы, смакуе Лявонка,

ды раптам як плюне!

- Вы што! Яна ж горкая!

Падман! Ашуканства! Вой, бедныя птушкі...

Татуля! Мы сёння ж наладзім кармушку!



Алена Церашкова

[Black aspid]

КІРЫЛАВА ТАЯМНІЦА

Ёсць задума ў Кірыла:
Змайстраваць такія крылы,
каб з бусламі сябраваць
ды над стрэхамі лунаць.
Як такою таямніцай
ды з сястрой не падзяліцца?
Ды сястра Кірылу кажа:
- Ты ясі катлету з кашай,
А з бусламі жыць зручней,
Тым, хто жабак есць ды змей!

Алена Церашкова

[Кот Максім]

Шчыра дзякуй! Пекныя вершыкі! Я шмат іх пераклаў, пераклады на пераверку спаслаў у прыватнай цыдулцы.

[Black aspid]

Вось дзяўчынка Авялінка.
Не глядзіце, што бландзінка!
Бо разумніца такая:
І задачы вырашае,
і малюе, і чытае,
грае, танчыць і спявае!
І такою вучаніцай
Наша школа ганарыцца.

Алена Церашкова

[Black aspid]

МАЦЕЙ (2!), ЛЁНЯ
Клей праліўся на падлогу.
Стаў Мацей анучай соўгаць -
Дый прыклеіўся. Надзейна!
Добры клей набыў Мацейка.

Гэй, зайграй, мой Мацей,
Дый пацеш гасцей.
Заспявай, як зайкі
Скралі балалайкі!
Хай госцейкі скачуць,
Болей хай не плачуць,

Сёння Лёня наш вясёлы!
Ён з бутэлечкі зялёнай
Сёрбаў па дарозе ў школу
Ёгурт цёпленькі, салёны!
Ёгурт па рэцэпце нашым –
Зёлкі, соль ды сыракваша!

Алена Церашкова

[Black aspid]

ЮРКА, НАДЗЕЙКА, ІРЫНКА

Юрка – юнга з Юкатана –
любіць Юлю, Юну, Таню.
Юля Юркам пагарджае,
Юна і не заўважае.
Ты, Юрасю, не журыся,
А з Танюшай ажаніся!

Ніколі, нідзе, нікаму, нізавошта
Не скажа Надзейка пра казачны востраў.
Ён недзе ў сінім ляжыць акіяне,
На ім кожны дзень паспяваюць бананы,
Ніхто там не будзіць у школу ўранні,
Ніякіх не робяць там хатніх заданняў.
Хто там апынуўся – з’язджаць не хацелі.
Наш казачны востраў завецца Нядзеля!

Ірынка ірыскі купіла
І моўчкі ў кішэні насіла.
Нікому пра іх не казала,
Дзяліцца ні з кім не жадала.
І толькі Ілюша ды Верка
З Ірынкай дзялілі цукеркі.