Неяк захацелася нам зладзіць маленькае пірацкае свята. Запрасілі гасцей (недзе ад 6 да 8 год), зрабілі пірацкія капелюшы з паперы, набылі шакаладныя манеткі (будучы скарб) і пачалі рыхтаваць конкурсы. У выніку абралі такія:

1. Робім сцягі.
Дзеці атрымліваюць па 2 аркушы паперы (пажадана А3 фармату) і вялікія маркеры. Задача: намаляваць 2 сцягі, адзін з якіх будзе пірацкі, а другі - сцяг карабля вандроўнікаў-першаадкрывальнікаў.

2. Выдумляем назвы караблёў.
Папярэдне мы раздрукавалі шмат літараў (па 2 літары на аркуш А4, каб былі вялікія). Дзецям трэба было скласці з гэтых літараў назвы для караблёў: пірацкага і вандроўнага.

3. Рыхтуемся да шторму.
Як вядома, у моры карабель увесь час падкідаюць і гойдаюць хвалі. Сапраўдныя марскія ваўкі мусяць быць падрыхтаваныя да гэтага.
Два дарослыя бяруць вялікую трывалую посцілку, на яе кладзецца дзіця, а дарослыя яго гойдаюць. Стаўшы потым на цвёрдую зямлю, дзіцё мусіць прайсці 5 крокаў па роўнай лініі!

4. Рыхтуемся да начной вахты на палубе.
Расстаўляем кеглі ў 2 шэрагі, калідорчыкам, а дзецям па чарзе завязваем вочы. Яны мусяць прайсці паміж кегляў, не зачапіўшы, па магчымасці, ні адну з іх!

5. Адбіваем атакі варожых караблёў.
Тут можа быць некалькі варыянтаў. Калі ўсе дзеці дастаткова даросыя і маюць неблагую каардынацыю рухаў і адказнасць, то можна ўзяць сапраўдны дарц, прымацаваўшы ў цэнтральным коле намаляваны карабель. Але можна і абысціся звычайным дарцам з мячыкамі на ліпучках - малыя ахвотна пакідаюць іх пару хвілін.

6. Марскія вузлы.
Спатрэбяцца некалькі досыць тоўстых вяровак. Дзецям прапануецца завязаць па 3 вузлы і перадаць іх сябру. Той мусіць развязаць. Хто хутчэй справіцца, той і малайчына!

7. Пірацкая здабыча!
У палатняны мяшэчак, які зверху зацягваецца вяроўчынай, закідваем розныя "скарбы": цукерку, ліхтарык, манетку, губны гармонік, компас, пластыкавы кінжал і г.д. Дзеці па чарзе намацваюць нешта ў мяшэчку, уголас кажуць, што яны зараз выцягнуць, а потым выцягваюць. Хто здагадаўся, той добра ўмее паляваць на здабычу!

8. Марская рэгата
Робім разам папяровыя караблікі: дарослы паказвае, а дзеці робяць за ім, напрыканцы - падпісваюць і размалёўваюць. Потым па 2 ставім караблікі на журнальны столік. Гаспадары караблёў мусяць дзмуць на іх, каб караблікі слізгалі на "супрацьлеглы бераг". Хто першы - той перамог.

9. Марскі шторм!

Набіраем у вялікі тазік ваду, запускаем туды ўсе караблікі. Дзеці становяцца вакол тазіка. Рукамі караблі чапаць нельга, а можна толькі дзьмуць на флот супернікаў. Чый карабель патоне апошнім, той перамог!

10. Перацягванне каната
Сапраўдны марскі конкурс. Спатрэбіцца максімальна тоўстая вяроўка.

11. Муміі
Муміямі давядзецца пабыць дарослым Міргаю

. Дзеці захопліваюць чужаземцаў у палон і пераўтвараюць у муміі: абкручваюць з ног да галавы (для гэтага спатрэбяцца зэдлікі) прыбіральнай паперай.

12. Віктарына
Хто першы слушна адказвае на пытанне - атрымлівае піястры (шакаладныя манеткі).
- Што робіць пірат, калі ў яго на носе сядзіць верабей? (Спіць)
- Што лягчэй: кілаграм золата ці кілаграм жалеза? (Аднолькава)
- Ці можа страус сказаць, што ён - птушка? (Страус не размаўляе)
- Хто зможа назваць усе акеяны?
- Хто ведае ўсе мацерыкі?

13. Будуем ланцуг
Спатрэбіцца шмат прышчэпак для бялізны. Дзеці дзеляцца на 2 каманды, кожная атрымлівае палову прышчэпак. Пад вясёлую музыку за 1 хвіліну (ці 30 сек., калі прышчэпак мала Сьмешка

) дзеці мусяць скласці максімальна доўгі ланцуг, сашчапляючы прышчэпкі міжсобку. Для больш старэйшых дзяцей падыдуць і канцылярскія сашчэпкі.

14. Упартыя капітаны
На падлозе кладзем невялічкі дыванок. Дзеці ў ролях капітанаў па чарзе ўдзельнічаюць у двубоях: упіраюцца адзін у аднога ілбамі і спрабуюць адціснуць суперніка за межы дыванка. Рукамі і нагамі чапаць суперніка нельга!

А напрыканцы - шыкоўны пачастунак і вясёлая пірацкая дыскатэка!

Падрыхтавала Крысціна Вітушка

Вельмі шмат пірацкіх ідэяў можна пачытаць тут toppartyideas.com/pirate-party (па-ангельску)

Глядзіце таксама

Зрабі сам: пірацкі капялюш

Цэтлікі (тэгі)

Kryscina, 19.10.11 17:13
Рэд. Kryscina, 8.12.11 11:47

Адзнакі: 0.00/5.00 [0]

Няма каментараў да гэтага артыкула

Перайсці:

У артыкулах захаваны правапіс аўтара. Тэксты выкладзеныя ў азнаямленчых мэтах. Калі знаходжанне пэўнага тэксту ў нашай бібліятэцы парушае Вашыя аўтарскія правы - калі ласка, паведамце пра гэта па адрасе dzietki@gmail.com і мы тэрмінова прыбяром тэкст з сайту.
© "Нашыя дзеткі", 2006-2010. Усе правы абароненыя. Выкарыстанне матэрыялаў у камерцыйных мэтах ЗАБАРОНЕНАЕ. Пры некамерцыйным выкарыстанні матэрыялаў спасылка на сайт "Нашыя дзеткі" абавязковая.
Па ўсіх пытаннях лістуйце нам!