На беларускіх жалудох
Даў спосаб свінням бог,
Тутэйшым свінням, беларускім —
Ім гэта байка для закускі.
Жыруюць тут, растуць іх трыбухі,
І адкладаецца ў іх сала.
Свіння ж свіннёю быць не перастала,
І свінскія захованы грахі.
Наеліся тут дзёдзькі жалудоў,
Сваіх прыдбалі парасят
І рохкаюць на той жа свінскі лад,
Палёгшы між дубоў.
— Скажы, кума: ну, як нам быць?
Дзе нам дзяцей сваіх вучыць?
І як ім рохкаць тут:
Ці па-тутэйшаму, ці не?
Скажы, імостанька, ты мне,
Бо ўсё ж нам родны гэты кут —
І гадаваліся мы тут,
Унь там і выган наш і груд,
Балоты тыя і лясы…
— Кума!
Да ў іх на грош красы
Няма!
І што трывожыцца дарма?
Мне прыкра чуць такія галасы!
Я факультэт акончыла сама.
Не менш, як у карыце,
Сваім лычом капалася ў санскрыце,
І добра знаюся я ў мовах
І ў далікатных розных словах.
Пакінь, жа мілая, смяшыць людзей:
Ну хто адважыцца псаваць сваіх дзяцей?
Бо як жа гаманяць тутэйшыя дубы?
Іх голас брыдкі і грубы
І не ачэсаны, слабы,
Немілагучны,
Прыдуманы і штучны,
Ні гібкасці, ні сілы,
Паэзіі і музыкі ні-ні,
Убоства, дзе ні павярні…
О, божа, барані!
Мне ён нудзіць, рве мне жылы!
Як ён агідны! Як нямілы!
А гэта «дзе», гэта «це»
Мне болем адклікаецца ў хвасце.
І родны кут, ды вось не мой,
Для віду ж пойдзем з ім на шлюб,
А наш «кумір» — Крылоўскі дуб.
Я — маці, мілая, і дзетак хоць зняволю,
А па-тутэйшаму і рохкнуць не дазволю!

Якуб Колас

Цэтлікі (тэгі)

julcik, 30.01.07 15:22
Рэд. Kryscina, 12.06.11 20:22

Адзнакі: 5.00/5.00 [1]

Няма каментараў да гэтага артыкула

Перайсці:

У артыкулах захаваны правапіс аўтара. Тэксты выкладзеныя ў азнаямленчых мэтах. Калі знаходжанне пэўнага тэксту ў нашай бібліятэцы парушае Вашыя аўтарскія правы - калі ласка, паведамце пра гэта па адрасе dzietki@gmail.com і мы тэрмінова прыбяром тэкст з сайту.
© "Нашыя дзеткі", 2006-2010. Усе правы абароненыя. Выкарыстанне матэрыялаў у камерцыйных мэтах ЗАБАРОНЕНАЕ. Пры некамерцыйным выкарыстанні матэрыялаў спасылка на сайт "Нашыя дзеткі" абавязковая.
Па ўсіх пытаннях лістуйце нам!